Asasakka Qaqortumi, Kommune Kujallermilu innuttaaqatikka, Meerannguit, Inuusuttut, Inersimasut Utoqqaallu

Ullumi ukiup ingerlanerani ilaqutariittut qilanaarisartakkatta tassalu sapaasuit aallarnerlugit nalliuttorsiortarnitta aallartinnerani uummammik pisumik pilluangaaritsi. Ullormilu tassani ileqqoraarput illoqarfitta nuannersup orpia nuannaarluta ikittarlugu, taasumallu ingerlannissaanut Kommuni sinnerlugu tikilluaqquassi.

Kingumut ukioq tamatsinnut misigisaqarfiusimaqisoq naajartulerparput, ilisimavarpullu aamma ukiup ingerlarngani inuttut aaqqusaakkavut assigiingissimaqisut, tamakkulu pissutaallutik misigissutsittigut maanna atukkavut assigiingikkunarput, ilavummi ukiup ingerlanerani asasaminnik assigiinngitsutigut qimanneqarsimallutik maqaasisaqarput, ullullu atulikkatta inuit tamakku misigissutsikkut annertuumik naalliuuteqartittarai ilisimavarput tamakkulu misigeqatigaavut neriuppugullu ullut anersaakkut pilluarnartut atulikkatta inoqativut tamakku tarnikkut timikkullu nakussassarluarumaaraat.

Meeqqat asasavut ilissinnguit eqqaamajuartarsiuk, ilissi pillusi ullut makku pingorsimammata ilissilu pillusi angajoqqaasi ulluni makkunani annertuunik suliaqarlutillu naammassisaqarniartussaammata ullut atulikkavut ilissinnut nuannersumik pilluarnermillu misigisaqarfiunissaat anguniarlugu, eqqaamaju-arsiuk asaneqarassi. Ilaqutariit eqqaamajuarsiuk ullut atulikkavuttaaq atugassaammata ilaqutariilluni inooqqatigiinnermi asanninnermik nukittorsaaffittut, tamatta pingaartitsigu ilaqutariittut timikkut tarnikkullu peqqissuunissatta anguniarnissaa.

Pisarnerput malillugu illoqarfitta orpia pinnersoq kusanartorlu qallunaat nunaanni illoqarfittut ikinngutitsinnit Aarhusimit pinnattaaraarput, piffissarlu iluatsillugu Aarhusimi innuttaasut sinnerlugit Aarhusimi Borgmesterip Nicolai Wammenip inuulluaqqussutaa minnerunngitsumillu juullisiorluarnissassinnik ukiumullu nutaamut iserluarnissassinnik kissaasinera ilissinnut apuutissavara, maangaaniillu tunissummut kusanartumut inuulluaqqussummullu qujassuteqa-leruma ilissinnit inuulluaqqussut apuukkumaarpara.

Piffissarlu una iluatsillugu Kommunimi sulisugut, Nukissiorfimmi sulisut, Qaqortumi Qatserisartut minnerunngitsumillu Qaqortumi Lions Club qujaffigissavakka ualeq massuma nuannersup ingerlannissaanut suliniuteqarluarsimammata.

Naggataagut neriuutigissavara orpipput kusanartoq innuttaasugut tamatta paarilluarlugu pigissagipput, orpimmi taamak kusanartigisoq pinnertigisorlu ullut nalliuttorsiorfivut naallugit allanngorani napatikkusunnarpoq.

Meeqqat qilanaarisarput naammassitigu!