Teknikkeqarnermut Ingerlatsiviup aqqusernit, pisuinnaat aqqutaat, ikaartarfiit, timersortarfiit, pinnguartarfiit peqqissarfigineqarsinnaasullu, majuartarfiit biilinullu uninngasarfiit kiisalu taakkununnga atatillugu erngup kuuffii il.il. (kussernit, sermiiaanerit il.il.) ingerlanneqarneri suliarisarpai. Suliat nalinginnaasumik kommunimi entreprenøreqarnermut ingerlatsiviup kiisalu suliffeqarfiit namminersortut suliarisarpaat.

Kommune Kujallermi siunertaavoq pineqartuni nutaanik pilersitsinissanut aserfallatsaaliinissanullu aningaasanik qulaajaasoqarnissaa, taamaalilluni aningaasaliissutit ataasiakkaat naatsorsuutigineqanngitsut pinngitsoorneqarniassammata.

Qaqortumi kommune nammineerluni asfaltiliorfeqarpoq, eqqarsaatigineqarporlu 2009-mi Narsami kingusinnerusukkullu Nanortalimmi asfaltilersuinissanut misiliutitut assartuisoqarnissaa. Misiliutit qanoq kinguneqarneri apeqqutaatillugit, asfaltinut tunngasut ataatsimoortumik aaqqiisoqarnissaa sulissutigineqarpoq, taamaalilluni kommunimi tamarmi ullutsinnut naleqquttunik aqqusineqarnissaa qulakkeerneqarniassammat.

"Illoqarfik qorsuttut" kommunip ilaatigut avataanit isigineqarnerani, siunertarineqarpoq nunaminertat qorsuunissaat.

Aputaajaanerit

Teknikkeqarnermut Ingerlatsiviup kommunimi aputaajaanernut akisussaavoq.
"Ukiuunerani kiffartuussinernut" atatillugu pingaarnertut tassaapput aqqusinernik, pisuinnaat aqqutaannik, majuartarfinnillu aputaajaanerit kiisalu siorarterinerit. Kiisalu aqqusinernik, kussinernik aqqusernillu ataanni kuuffinnik sikuiaanerit. Nalinginnaasumik suliassat kommunip entreprenøreqarnermut ingerlatsivianit kiisalu erntreprenørinit namminersortunit suliarineqartarput.

Aqqusernit, pisuinnaat aqqutaat majuartarfiillu pingaarnerit akulikitsumik aputaajarneqartartussatut toqqarneqarsimapput. Pisuinnaat aqqutaat majuartarfiillu kikkunnit tamanit atorneqarneq ajortut, aputaajarneqartassapput, kisiannili aqqusernit aputaajarneqareersimasut innersuussutigineqartarput.

Busseqarnermut ingerlatsineq

2005-mi upernaakkut politikikkut aalajangerneqarpoq Qaqortumi kommunimimit ingerlanneqartumik bussinik ingerlatsisoqarnissaa. Tassunga atatillugu bussit mikisut 19-nik tamarmik ilaasoqarsinnaasut marluk atukkiunneqarput kiisalu sulisut 4 pineqartumut atorfinitsinneqarlutik.
Kommunimi bussinik ingerlatsineq nalinginnaasumik niuernerpalaartumik ingerlatsineq aallaavigalugu pissaaq. Taamaattoq kommune ingerlatsinermut tapiissuteqartarpoq. Politikikkut aalajangerneqarpoq, pineqartoq ungasinnerusoq isigalugu namminersortunngorsarniarneqassasoq.